DARING SAKONE’ SE EJARING

DARING SAKONE’ SE EJARING Nagara sadunnya epagipo kalaban badhana Virus Corona otaba severe acute respiratory Syndrome coronavirus 2 (SARS-CoV-2) se langkong ekennal kalaban nyama Virus Corona. Virus gapaneka bisa aganggu dha’ jalanna nyaba se bisa apanggibat seksek. Manabi tapalang bisa andaddiyagi talajana kantos adinggal. Panyake’ se esababbagi virus gapaneka sareng WHO esambat COVID-19 se artena Corona Virus Disease 2019. Badhana Covid-19 nambai galgalla ate sareng car-kacerra rarengganna kaodhi’an. Pamarenta sareng magarsare padha posang. Sadaja darma elakone sopaja ta’ nambai rosagga ponapa se ampon ekakarep. Sakola’an se samastena kodu taronggu dhalem ajalannagi tareka pandhidhikan, molae tapelga’. Ontongnga pamerenta gi’ abalangaja nyare tareka sopaja pandhidhikan ta’ sordhep. Sopaja guru tettep gate kaangguy abulang moret. Moret paggun bisa ajar sareng ngaolle elmo. Moret se biyasana e bulang e sakola’an, kaangguy sabatara bakto ajar e bengkona bang-sebang ekancae oreng seppona otaba korabana. Tareka abulang se kadi gapaneka kasambat daring (dalam jaringan). Daring se aropa’agi sala settong tareka kaangguy abulang moret, ta’ gampang e lakone. Sabab guru dhalem ajarba’agi babulangan elmo parlo settong pakakas se kasambat HP android. Mored jugan kodu andhi’ pakakas gapaneka. Salaen gapaneka oreng seppona moret jugan kodu lerres-lerres ngagali ka maksod tor tojjuwanna daring. Reng seppona moret bannya’ se nempowagi ka guru. Manabi reng seppona moret se gadhuwan kalakowan se sae tantona ta’ sossa. Kantos badha reng seppona moret se adhabu, ”manabi kaula se alako ngarkar nyolpe’ napa se daddiya kaangguy ngobange HP?” Rassa talka dhadha, manabi ampon mereng dhabu kadi gapaneka. Ja-ngaja abalangaja terro na’ poto molja. Okara gapaneka ropana paggun badha e atena oreng Madura. Se terro matekka’a pangaterrona ana’ sopaja bisa ngaolle kamoljaanna elmo. Lekka’ nyare otangan paggun ejalane. Obang ollena aotang epangobange HP. Kaangguy baragat teddha daddi se nomer dhuwa’. Gapaneka daddi gessana reng seppona moret. Abulang moret lebat HP saestona nambai rengsa ka guru. Molae dhari masanat se eajarba’agiya, tareka moret se ceppedda ngarte, tor moret se gateya ngalakone lateyan, lerres-lerres daddi rengsana pekkeran. Moret tantona posang jugan. E bakto molae molang, moret ampon sanat se narema’a babulangan/pangajaran sakodi’ bunga dhalem ate. Nangeng ate tellap telle. Ponapa moret lerres-lerres ngateyagi ponapa bunten. Tape aba’ paggun nyangka sae. Ja’ moret taronggu dhalem narema babulangan. Bila epareksane ollena molang lebat HP, takadhang aba’ reggit ka aba’ dibi’. Sakeddaban aromasa loco sampe’ sem-ngesem dibi’. Aponapa? Jawabanna moret dhari babulangan se ejarba’agi acem-macem. Nangeng gapaneka ngajari aba’ kaangguy sabbar tor laten. Jawabanna moret sapaneka: enggi ampon jarna’ Pa’, kaula bak-abak ngarte, mantul Pa’, sip Pa’, posang gi’ Pa’, ponapa badha tugas, wkwkwk, ban salaenna. Kaangguy nambai ngarte, moret eberri’ soal se jawabanna jugan e karem lebat HP e galumpo’ WA kellas. Kadhang padhana ngantos tadha’ se eantos. Manabi moret se lakar gite tor taronggu, ta’ saponapa abit pas ngerem foto jawabanna se etoles e buku tugas. Badha se ngerem foto dibi’ e baktona alako tugas. Badha se ta’ ngerem. Se abak nyoba’ kasabbaran, gi’ badha se atanya, ka’emma tugassa Pa’?, foto se ekerem sampeyan kaangguy ponapa Pa’? Saamponna saponapa kale babulangan anglebadi WA. Moret molae gite kaangguy ajar. Sabban tugas ampon ceppet elakone. Paleng abidda bakto Asar maba ampon ekerem. Se sapaneka manabi saampona daring gi’ ekabuto reng seppona polana badha kaparlowan. Dhalem aguna’agi HP moret ampon lebbi toro’ oca’. HP-na ta’ namong eguna’agi kaangguy en-maenan malolo, manabi lalakon kaangguy pangajaran gi’ ta’ lastare. Badha jugan oreng seppona moret bila tapanggi pas mamadul. Ja’ manabi potrana alako tugas sambi esellae amaen en-maenan se kasambat game. Tor jugan manabi badha se etanya’agiya, moret ampon bisa aguna’agi okara se langkong sae. Oca’ se biyasa eangguy na’-kana’ ngangudhadan se kasambat basa gaul ampon ta’ eangguy. Pangajaran se ebulangngagi ka moret ta’ bisa bannya’ akadi se ebulangngagi e kellas. Pojurra pamarenta ampon apareng katantowan batessa pangajaran se bisa ebulangngagi e jaman covid-19. Manabi oreng seppona moret se lakar esto, manabi apanggi, pas atanya. Aponapa pangajaran se bulangngagi ma’ ta’ padha sareng buku se epaenjam ka moret? Bila ejarba’agi ja’ pangajaran se ebulangngagi, sareng pamarenta ampon epasakone’ nangeng ta’ ngorange tojjuwannepon. Reng seppona moret buru ngagali. Nangeng badha jugan reng seppona moret se ampon pasra ka guru. Ta’ oneng dha’ bara’ temorra babulangan e jaman covid-19. Badha jugan se parcaja gallu’ ka potrana. Potrana esangka ngestowagi ka pangajaran, neng-oneng aen-maenan otaba nenggu video. Dhu matora kadiponapa. Kalaban badhana pangajaran lebat daring, reng seppona moret molae apangrasa ja’ morok na’-kana’ ta’ gampang. Merte na’-kana’ parlo kasabbaran. Ponapa pole potrana tamaso’ na’-kana’ se lakar parlo ekancae baktona ajar. Rassa busen moret se ajar lebat daring padha sareng se erassa’agi guru. Sadaja lalakon ekerem lebat HP. Kong-langkong guru se kodu nyalen ponapa se ekerem moret lebat HP ka komputer. Salastare e salen pas epareksa tong-settong kaangguy ngaonenge ngarte ta’ ngartena moret. Tor kaangguy ngaonenge, ponapa tojjuwan se earep ampon bisa ekaolle. Pangajaran lebat daring lakar sakejja’. Pangajaran se ebulangngagi sakone’. Tojjuwan se earep korang ekaolle. Meddhi’a solatengkana moret sopaja andhi’ solatengka se langkong sae parlo laten onggu. Karep ampon ejalannagi, tareka ampon eongguwagi, manabi ollena namong sakone’. Matora kadiponapa pole. Olle padhana ta’ olle. Bisa daddi cap-ocaban “Daring Sakone’ e Jaring”. ZAINAL ABIDIN, S.Pd SDN Talango IV Kec. Talango abi.zainal69@gmail.com